රළ නගන මිනිස්සු

‘රළ නගන මිනිස්සු’ යනු ලෝකය පුරා විවිධ භාෂාවලට පරිවර්තනය වී ඇති අමරිකානු නාට්‍යයකි. එය ඇමරිකා එක්සත් ජනපදය පුරාම වෘත්තීය නාට්‍යකරුවන් විසින් යළි යළිත් නිෂ්පාදනය කෙරිණි. එරට පාසල් සහ විශ්ව විද්‍යාල නාට්‍ය සංගම් විසින් ද සෑම වසරකම පාහේ නිෂ්පාදනය කරනු ලැබේ. පාසල් සාහිත්‍ය කලා පාඨමාලාවල පමණක් නොව විද්‍යා පාඨමාලා වලද මෙම නාට්‍යය අධ්‍යනය කෙරුණු අවස්ථා තිබේ. මනුෂ්‍ය චින්තන නිදහස ද තර්ක ඥානයද, විසම්මුතිය ද සැබෑ නිදහස් සමාජයක් සම්බන්ධයෙන් කොපමණ නම් අවශ්‍ය ද යන කාරණය ආකර්ෂණීය ලෙස දක්වන නාට්‍යයක් සේද ‘රළ නගන මිනිස්සු’ ප්‍රකට වී තිබේ. *යම්‌ කලෙක බලයෙහි සිටින රෙජීමය සහ එහි ප්‍රධාන දෘෂ්ටිවාදී සැකැස්මට වෙනස්‌ සියලු දෙනාම සැක කෙරේ. අධිපති දෘෂ්ටිවාද අභියෝගයට ලක්‌ කරන හෝ ඒ දෘෂ්ටිවාදවවලට නතු නොවන අය ‘දේශද්‍රෝහීන්‌’,‘ජාතිද්‍රෝහීන්‌’, ‘මවුබිමට එරෙහි වූවන්‌’ යනාදී විවිධ නම්වලින්‌ හඳුන්වනු ලැබේ. ‘බටහිර අනුකාරකයන්‌’,“ඩොලර්‌ කාක්කන්‌’, ‘එන්ජ්ඕකාරයන්‌’ යනු ලංකාවේ එවැනි යෙදුම්‌ කිහිපයකි. රාජ්‍යය හෝ යම්‌ සමාජයක අධිපති කොටස්‌ මෙවැනි නිදහස්‌ චින්තකයන්‌ මෙවැනි ද්‍රෝහිත්වයට නැංවීම මගින්‌ කොන්‌ කර, ඔවුන්ට සුජාතභාවය පෙන්වන්නට අභියෝග කරන විට අපට පෙනෙන්නේ මැකාර්තිවාදයේ හෙවැණැල්ලකි. රළ නගන මිනිස්සු නාට්‍යයෙහි මූලික තේමාවක්‌ වන්නේ ආධානග්‍රාහී අධිපති දෘෂ්ටිවාදවලට විරුද්ධව මානව චින්තන නිදහස ආරක්ෂා කිරීමය.*