කුර හඬෙකි වියැකෙන – 2023 ස්වර්ණ පුස්තක

2023 ස්වර්ණ පුස්තක සම්මානය දිනාගත් නව කතාව – නො දන්නා අතීතයක ඉඳන් තවලමක් ගව්, යොදුන් දුර ගමන් කරන්නේ චාරිත්‍ර වාරිත්‍ර කැටුව ය. මොවුහු අනුන්ගේ බත් පතක් රස ගන්වන ලුණු කැටයක් උදෙසා හත් අට මාසයක් අව්, වැසි, පිනි, නියඟ, ගංවතුර, සොර සතුරු, මර බිය නො තකා, ලෙඩ දුක් නො සලකමින්, කඳු හෙල් ගංගා පසු කරමින්, දෙපයේ වීරියෙන් ඇවිද එති. රුදුරු වන සතුන් හා ගැටෙති. නපුරු විස කුරු සපුනට ගොදුරු වෙති. ඔවුන් ආපසු යන ගමනේ දී ද එබඳු ම දුරක් ගෙවිය යුතුය. එබඳු ම දුකක් අත්විඳිය යුතුය. බොහෝ විට ඔවුන් එනවා මිසක් ආපසු යන ගමනක් ගැන විශ්වාසය තබනු අසීරු ය. එය හරියට මුහුදේත් අතුරෙත් යන ගමනක් වැනිය. ගිනි කාස්ටක අව්වේ හෙවනක හව්හරණක් නැතිව රත්වුනු යවටක් බඳු ලුණු මිදුණු ලියදිවලට බැස, ගෝනිවලට ලුණු පැටවීම පණ පිටින් අපාගත වන වැඩකි. මිදුණු ලුණු තට්ටුව යකඩ ඉනි වලින් ඇණ කඩද්දී ලුණුකැට විසිරෙන්නේ බිඳුණු වීදුරු කැබලි වගේය. වාංපතුල් දා ගෙන හිටියත් යටිපතුල් කැපී ගලන ලෙයින් ධවල ලවණ තලාව රත් පැහැ ගනී. එවිට ලුණු කඩන, ගෝනිවලට අසුරන කම්කරුවන් පෙනෙන්නේ හරියට පන්සලේ විහාර මන්දිරයේ බිතුසිතුවම් තුළින් හමුවන අජාසත්ත පුතා විසින් පතුල් පලා ලුණු දමන බිම්බිසාර තාත්තලා වගේය. මේ හැම කුලී කාරයෙක් ම රජවරු වෙන්න සියලු සුදුසුකම් සහිත බිම්බිසාර තාත්තලා ය. එහෙත් සංසාර ගත යම් කරුම දෝෂයක් නිසා මේ වගේ පණ පිටින් අපාගත කුලී කුරක්කමකට, ලුණුත් එක්ක දියව යන කරුම ජීවිතයකට ඔවුහු ගොදුරු ව සිටිති.