ඈත අතීතයේ සිට 1948 දක්වා සංක්ෂිප්ත ශ්‍රී ලාංකේය ඉතිහාසය

මෙම කෘතියෙන්‌ ප්‍රධාන කරුණු දෙකක්‌ අවධාරණය කෙරෙයි. පළමුවැන්න ගෝත්‍රික යුගයෙන්‌ පසු දහනවවැනි ශතවර්ෂය දක්වා ශ්‍රී ලංකාවේ බිහි වූ සමාජය විවිධාකාරයෙන්‌ වැඩ වසම්‌ ස්වරූපයක්‌ ගත්‌ නමුත්‌ එය යුරෝපීය වැඩ වසම්‌ රටාවට වඩා බෙහෙවින්‌ වෙනස්‌ වූ බව ය. දෙවැන්න බ්‍රිතාන්‍ය යුගයේ දී වැඩ වසම්‌ අංග බහුතරයක්‌ අහෝසි වී ධනේශ්වර පරිවර්තනයක්‌ සිදුවීම සාධනීය පියවරක්‌ වුවද එම පරිවර්තනය සාපේක්ෂ වශයෙන්‌ නො දියුණු ග්‍රාමීය ආර්ථිකය සැලකිය යුතු වෙනසකට ලක්‌ නොකර දිවයින යටත්‌ විජිතවාදය විසින්‌ බිහි කළ ඌන සංවර්ධනයේ  ග්‍රහණයට හසු කරන ලද බව ය. මෙම ප්‍රධාන නිගමන දෙකට අදාළ ඓතිහාසික සිද්ධීන්‌ සමූහය මුල්‌ පරිච්ඡේදවල සැකෙවින්‌ පෙළ ගස්වා ඇත.